Þetta kemur fram í tilkynningu frá lögreglustjóranum á Suðurnesjum. Hættumatskort Veðurstofunnar gildir til klukkan 18 þann 29. desember.
Íbúum Grindavíkur er áfram heimilt að fara og dvelja heima hjá sér þar til breytingar á hættumatskorti gefa tilefnis til annars, sem gæti gerst með skömmum fyrirvara.
Í tilkynningunni er sérstaklega ítrekað að:
„Eldgos getur hafist nágrenni Grindavíkur með stuttum fyrirvara. Erfitt getur reynst að tryggja öryggi þeirra sem dvelja eða gista inni á hættusvæði. Þeir sem fara inn á merkt hættusvæði gera það á eigin ábyrgð.
Viðbragð björgunarsveita er áfram skert. Engin björgunarsveit verður í Grindavík. Kallið eftir aðstoð með því að hringja í 112.“
Þá segir að hefjist eldgos í eða við Grindavík verða send út sms-skilaboð á GSM-síma inn á svæðinu með þessum texta: RÝMING RÝMING! Yfirgefið svæðið hratt og örugglega, hringið í 112 ef ykkur vantar aðstoð. RÝMING RÝMING ……. EVACUATE! Leave the area quickly and safely, call 112 if you need help.
Lögregla sinnir eftirliti í og við Grindavík eins og verið hefur allan sólarhringinn.
Liðsmenn björgunarsveitarinnar í Grindavík eru dreifðir um landið og ekki til staðar í bænum. Þá er bent á að mögulegar flóttaleiðir eru um Nesveg, Suðurstrandarveg og Grindavíkurveg.
