„Fyrst og fremst og svo til eingöngu hafa þessi viðbrögð verið óvenju jákvæð og full þakklætis og rétt er að þakka fyrir það. Einstaka útúrsnúningur og ásakanir um eitthvað sem ekki á við rök að styðjast er sjálfsagt óhjákvæmilegur fylgifiskur umræðu um eldfim efni af þessu tagi,“ segir Sigurður og vísar væntanlega í skrif Finns Th. Eiríkssonar sem er meðlimur í Menningarfélagi Gyðinga og stjórnarmaður í samtökunum Með Ísrael fyrir friði.
Finnur skrifaði grein á Vísi í gær, sem DV fjallaði meðal annars um, þar sem hann sakaði Sigurð um gyðingahatur vegna greinarinnar.
„Sigurður Skúlason er maður sem notar samkennd með Palestínumönnum sem skjól fyrir hatri sínu. En er Sigurður Skúlason einn um þessa afstöðu? Greinilega ekki, því um fimm þúsund manns hafa líkað við færslu hans,“ sagði Finnur meðal annars.
Í ljósi þessa vill Sigurður ítreka nokkur atriði og gerir hann það í umræddri grein í morgun.
„Að hata aðra manneskju er að hata sjálfan sig, því innsta eðli manneskjunnar er eitt og hið sama. Það felst í kjarna allra trúarbragða að lífið sjálft sé heilagt og þannig er enginn maður öðrum æðri og enginn maður öðrum óæðri,“ segir hann og heldur áfram:
„Ég hata ekki neina manneskju. En ég þekki hatur af eigin raun og það er sannarlega þungbær og lamandi lífsreynsla. Reynsla sem eitrar og eyðileggur líf. Við yfirvinnum ekki hatrið í sjálfum okkur nema með því að gangast við því – taka það til okkar og leysa það þannig upp. Að sjálfsögðu hef ég tilfinningar og ég get haft andúð á og jafnvel fyrirlitið framferði manna gagnvart öðrum mönnum. Framferði þar sem myrkur ræður oft för.“
Sigurður endar grein sína á að vísa í sjálfan Jesú.
„Jesús Kristur sagði: „Ég er ljós heimsins.‟ En hann sagði líka: „Þið eruð ljós heimsins.‟ Við erum öll ljós heimsins.“
