Þrjú úrvalsdeildarlið hafa mikinn áhuga á Exequiel Palacios, leikmanni Bayer Leverkusen.

Um er að ræða 25 ára gamlan miðjumann sem hefur heillað mikið með Leverkusen það sem af er leiktíð, en liðið hefur staðið sig frábærlega og er á toppi þýsku úrvalsdeildarinnar.

Palacios er nýbúinn að skrifa undir samning við Leverkusen til 2028 en það stöðvar ensk félög ekki í að sýna honum mikinn áhuga. Það styrkir þó stöðu þýska félagsins við samningaborðið til muna.

Samkvæmt TNT Sports eru Manchester City, Newcastle og Aston Villa félögin þrjú sem um ræðir.

Palacios á að baki 27 A-landsleiki fyrir hönd Argentínu og var hann til að mynda hluti af hópnum sem varð heimsmeistari í Katar undir lok síðasta árs.