Skelfing greip um sig á veitingastað McDonalds í Birmingham á Englandi í gær þegar maður, með fánaliti Palestínu á höfðinu, gekk inn á staðinn með stóran kassa sem var fullur af lifandi músum.

Maðurinn gekk inn í anddyri staðarins og skutlaði nagdýrunum á gólfið áður en hann hafði sig á brott og sagði nokkur vel valin orð til stuðnings Palestínu og gegn innrás Ísraelshers á Gaza-svæðið.

Maðurinn kallaði svo eftir sniðgöngu á McDonalds-veitingastöðunum, Starbucks-kaffihúsakeðjunni og stórfyrirtækinu Disney vegna meints stuðnings þessara fyrirtækja við málstað Ísraels.

Í umfjöllun Daily Mail er vitnað í yfirlýsingu frá McDonalds þess efnis að mýsnar hafi verið fjarlægðar og staðurinn hreinsaður hátt og lágt í kjölfar atviksins.

Ekki liggur fyrir hvort maðurinn hafi verið handtekinn eftir atvikið í gær.