Ólafur gegndi sömu stöðu hjá Breiðabliki í sumar og samkvæmt fréttum stefndi í að hann tæki hana að sér hjá HK.
„Það skiptir eiginlega engu máli hversu nálægt þú ert ef það er ekki búið að ganga frá neinu og það verður ekki af því,“ sagði Ólafur um málið og hélt áfram.
„En ég get alveg sagt þér það að við vorum búin að eiga mjög góð samtöl og vorum komin á fínan rekspöl, ég og forsvarsmenn HK. Það var búið að eiga sér mjög gott og langt samtal.“
Sagan segir að ástæða þess að Ólafur hafi ekki verið ráðinn hafi verið fjárhagslegs eðlis.
„Ég þekki það ekki. Ég heyri bara það sama og þú, að þeim hafi ekki fundist tímabært að ráða í þessa stöðu á þessum tímapunkti. Það er bara gott ef þeim hefur fundist þetta of stór biti og sýna ábyrgð í rekstri.“
Ólafur tók þess í stað við spennandi verkefni í Laugardalnum þar sem hann verður þjálfari kvennaliðs Þróttar.
Viðtalið við hann í heild er í spilaranum og í hlaðvarpsformi hér að neðan.
