Pappírs sorppokarnir undir lífrænar matarleifar verða áfram ókeypis um hríð. Sveitarfélögin hafa greitt fyrir pokana fram að þessu en um mánaðamótin tekur Sorpa við að borga fyrir þá.
„Á þessum tímapunkti liggur ekki fyrir að breyting verði á gjaldfrjálsri afhendingu pokanna,“ segir Gunnar Dofri Ólafsson, samskipta og þróunarstjóri Sorpu við fyrirspurn DV.
Pokarnir hafa verið afhentir í helstu matvöruverslunum frá því í júní síðastliðnum og eru hluti af nýja flokkunarkerfinu. Þetta eru bréfpokar sem brotna auðveldlega niður og festast ekki í vélbúnaði móttökustöðva Sorpu.
Tilkynnt var í sumar að pokarnir yrðu „fríir til að byrja með“ en ekki tilgreint nánar hvort eða hvenær byrjað yrði að rukka fólk fyrir þá.
DV hefur orðið var við orðróm þess efnis að það líði ekki á löngu þar til hætt verður að dreifa pokunum frítt. Einnig að sumt fólk sé þegar byrjað að safna miklu magni af þeim heima hjá sér til að eiga góðan lager áður en gjaldtakan hefst.
Þá hefur DV einnig haft spurnir af því að fólk noti pokana undir annað en matarleifar og lífrænt eldhússorp.
Fram að þessu hafa sveitarfélögin borgað brúsann fyrir framleiðslu og dreifingu pokanna. Er þetta töluverður kostnaður fyrir þau.
Að sögn Gunnars Dofra hafa sveitarfélögin greitt 192 milljónir króna, án virðisaukaskatts, fyrir fyrstu 20 milljón pokana. Reykjavík greitt 112 milljónir króna, Kópavogur tæpar 30 milljónir, Hafnarfjörður 24, Garðabær 13, Mosfellsbær 9 og Seltjarnarnes 4 milljónir.
Þetta fyrirkomulag er hins vegar að renna út núna um mánaðamótin. „Frá og með 1. nóvember mun Sorpa bs. greiða fyrir pokana,“ segir Gunnar Dofri.
Að sögn Gunnars Dofra kostar eitt búnt af pokum 768 krónur án virðisaukaskatts. En í því eru 80 pokar. Gera má því ráð fyrir að þegar og ef almenningi verður gert skylt að kaupa pokana þá muni búntið kosta 953 krónur í það minnsta.
