Héraðsdómur Norðurlands eystra hefur dæmt karlmann í tveggja mánaða skilorðsbundið fangelsi og til að greiða 580 þúsund krónur í miskabætur vegna árásar á dyravörð á Akureyri haustið 2021.

Árásin átti sér stað aðfaranótt sunnudagsins 31. október 2021 og var maðurinn ákærður fyrir að kýla dyravörð í bakið þegar dyravörðurinn var að reyna að stöðva átök á milli ákæra og annars gests á veitingastaðnum.

Afleiðingar árásarinnar voru þó nokkrar fyrir dyravörðinn því hann hlaut brot í lið brjósthryggjarliðar 5. Dyravörðurinn fór fram á að fá 1,4 milljónir króna í bætur vegna árásarinnar en fékk innan við helming þess.

Maðurinn sem var ákærður neitaði sök og krafðist sýknu í málinu.

Féll aftur á bak og fékk kast

Í dómnum kemur fram að lögreglumenn, sem kallaðir voru á staðinn eftir að átökin voru yfirstaðin, hafi séð umræddan dyravörð fá flogakast, kreppast saman og falla aftur á bak þar sem hann stóð við bar veitingastaðarins. Annar dyravörður sem stóð hjá honum náði að grípa hann og var sjúkrabifreið kölluð til. Dyravörðurinn var meðvitundarlaus í sjö mínútur og kastaði upp eftir að hann komst til meðvitundar.

Maðurinn sem var ákærður fyrir árásina kvaðst hafa lent í stympingum við annan mann á barnum en ekki átt upptökin. Hann hafi ekki barið neinn, en verið í stympingum við annan mann þar sem þeir hafi hrint og slegið til hvors annars.

Gat ekki notið föðurhlutverksins

Dyravörðurinn lýsti því að hann hefði átt nýfætt barn þegar atvikið gerðist og þetta hafi háð honum mikið. Hann hafi oft verið rúmliggjandi fyrstu mánuðina og með mikla höfuðverki. Þá hafi hann verið geðvondur af verkjunum í stað þess að njóta föðurhlutverksins. Loks hafi hann verið virkur í íþróttum en lítið getað stundað þær eftir þetta. Hann hafi náð sér þokkalega í dag en þetta geti fylgt honum út ævina.

Í niðurstöðu dómsins kemur fram að atburðarásin hafi gerst hratt og framburðir beri þess merki að vitni hafi átt erfitt með að greina hana með nákvæmum hætti. Var það aðeins hinn dyravörðurinn á staðnum sem kvaðst hafa séð manninn kýla félaga sinn í bakið.

„Eru engin efni til að vefengja trúverðugan framburð vitnisins og verður hann lagður til grundvallar gegn neitun ákærða. Verður ákærði samkvæmt öllu framangreindu sakfelldur fyrir þá háttsemi sem honum er gefin að sök samkvæmt ákæru,“ segir í niðurstöðunni.

Maðurinn sem sakfelldur er í málinu er með hreinan sakaferil en til þess sé að líta að brot hans var tilefnislaust og hafði talsverðar afleiðingar fyrir brotaþola. Á móti komi til mildunar að hann var ungur að aldri og hefur ekki brotið af sér síðan.

Fangelsisdómurinn er skilorðsbundinn til tveggja ára.