Ásdís Bergþórsdóttir sálfræðingur heldur því fram að einhverfum sé þráfaldlega vísað frá heilsugæslunni þar sem þekkingu skorti til að takast á við vanda þeirra. Þetta kemur fram í aðsendri grein á Vísir.is. Ásdís skrifar:
„Það vita allir sem vilja vita að heilsugæslan vísar einhverfum frá geðheilbrigðisþjónustu. Ekki alveg öllum er vísað frá en það heyrir til algjörar undantekningar ef fólk kemst að. Fólki hefur jafnvel verið vísað frá geðheilbrigðisþjónustu heilsugæslunnar vegna gruns um einhverfu. Það er sem sagt rétt að það er hægt að vísa einhverfum í meðferð í geðheilsuteymi eða í viðtöl á heilsugæslu en þeim er vísað frá vegna þess að ekki er til næg þekking á einhverfu.“
Í þessu samhengi er sláandi til þess að vita að einhverfum hættir mun frekar til sjálfsvíga en öðrum. Um þetta segir Ásdís:
„Það er til mikilsvirt rannsókn frá Svíþjóð sem sýnir fram á að næstum því tíu sinnum fleiri einhverfir látast af völdum sjálfsvíga en þeir sem eru ekki einhverfir. Ég endurtek einhverfir eru næstum tíu sinnum líklegri að deyja af völdum sjálfsvíga en óeinhverfir. Af þessum tölum er ljóst að þörf einhverfra eftir þjónustu er gífurleg. Samt er þeim neitað um geðheilbrigðisþjónustu í heilsugæslunni sökum vanþekkingar starfsmanna.“
Ásdís ber saman viðbrögð heilbrigðiskerfisins við líkamlegum sjúkdómum eins og Covid-19 og einhverfu. Í fyrra tilvikinu séu mannslíf meira metin. Hún segir ennfremur:
„Það er í hæsta máta óeðlilegt að neita fólki um geðheilbrigðisþjónustu á grundvelli fötlunar, skerðingar eða frávika frá hefðbundnum þroska og er mannréttindabrot.“
