Eins og DV skýrði frá fyrir helgi þá saka Indverjar Kanadamenn um að veita hryðjuverkamönnum skjól og um leið þvertaka þeir fyrir að tengjast morðinu á Najjir. En að sögn kanadísku fréttastofunnar CBC þá eru kanadísk stjórnvöld með gögn sem tengja indverska diplómata við morðið.
Segir CBC að meðal þeirra gagna sem kanadísk stjórnvöld hafa séu samskipti indverskra embættismanna, þar á meðal diplómata sem starfa í Kanada.
Heimildarmenn innan kanadískra löggæslustofnana hafa gefið í skyn að indverskir embættismenn hafi ekki þrætt fyrir ásakanir Kanadamanna þegar kanadískir embættismenn settu þær fram á fundum bak við luktar dyr.
Forstjóri kanadísku leyniþjónustunnar, þjóðaröryggisráðgjafi landsins og ráðgjafi stjórnvalda um upplýsingaöflun fóru allir nýlega til Indlands til að reyna að fá indversk stjórnvöld til samstarfs um rannsóknina á morðinu en án árangurs.
Mikill þrýstingur er á kanadísk stjórnvöld að skýra frá hvað upplýsingum þau búa yfir um morðið. Justin Trudeau, forsætisráðherra, hefur ekki viljað staðfesta að stjórnvöld ætli að opinbera þessar upplýsingar. Hann ræddi við fréttamenn í New York fyrir helgi og sagði þá að hann vilji ekki stigmagna deiluna við Indverja og hvatti þá til að starfa með Kanadamönnum að rannsókn málsins.
Financial Times segir að sumar af þeim upplýsingum, sem Kanadamenn hafa, hafi þeir fengið frá bandamönnum sínum í Five Eyes bandalaginu en í því eru Bandaríkin, Bretland, Kanada, Ástralía og Nýja-Sjáland.
