Meðalvinnuvika Íslendinga var 39 klukkutímar árið 2022. Vinnuvikan hefur sífellt verið að styttast á undanförnum árum en árið 2015 var hún 41 tímar. Íslendingar hafa þó enn þá ekki náð meðaltali Evrópu, sem er 37,5 tímar.

Þetta kemur fram í nýjum tölum Eurostat, tölfræðistofnunar Evrópusambandsins.

Ekki er langt síðan Ísland var á meðal þeirra landa þar sem vinnuvikan var hvað lengst. Í dag er hún lengst í Serbíu, 43,3 klukkutímar en þar á eftir koma Grikkland og Pólland. Almennt er vinnuvikan mun lengri í eystri hluta Evrópu en vestari. Ísland er hins vegar á meðal þeirra ríkja í vesturhlutanum þar sem vinnuvikan er lengst.

Styst er vinnuvikan í Hollandi, aðeins 33,2 klukkutímar. Þar á eftir koma Þýskaland, Danmörk, Noregur og Sviss.

Karlar í þriðja sæti en konur nítjánda

Mikill munur er á lengd vinnuvikunnar hjá körlum og konum. Íslenskir karlar vinna 42,2 tíma á viku, og er vinnuvikan sú þriðja lengsta í Evrópu. Vinnuvikan hjá íslenskum konum er 35,3 tímar og eru þær í nítjánda sæti í álfunni.

Bændur og sjómenn vinna mun lengur en heilbrigðisstarfsfólk

Einnig er mikill munur á lengd vinnuvikunnar eftir atvinnugreinum. Hjá bændum og sjómönnum er hún 53,9 klukkutímar, 43,4 hjá byggingingaverkamönnum, 42,3 hjá bílstjórum, 42,1 hjá verksmiðjufólki, 39,8 hjá starfsfólki fjármálafyrirtækja, 38,9 hjá vísindafólki, 38,7 hjá verslunarfólki, 37,8 hjá starfsfólki í veitingastaða og hótela, 36,5 hjá kennurum, 33,8 hjá listamönnum og 33,1 hjá heilbrigðisstarfsfólki svo einhverjar starfsgreinar séu nefndar.