Magnús Már Einarsson, þjálfari meistaraflokks karla hjá Aftureldingu, og Enes Cogic, aðstoðarþjálfari, hafa báðir framlengt samninga sína til tveggja ára eða út tímabilið 2025.

Maggi og Enes eru að klára sitt fjórða tímabil með Aftureldingu en undir þeirra stjórn hefur liðið bætt árangur sinn ár frá ári. Annað árið í röð hefur Afturelding slegið stigamet félagsins í Lengjudeildinni og þegar tvær umferðir eru eftir er liðið í harðri baráttu um sæti í Bestu deildinni, þvert á allar spár fyrir mót.

,,Það er gríðarlegur heiður að þjálfa uppeldisfélagið og ég hlakka til að gera það áfram næstu árin. Trúin og liðsheildin í hópnum er stórkostleg og við erum staðráðnir í að klára núverandi tímabil af krafti og ná markmiðum okkar. Strákarnir í liðinu hafa lagt mikið á sig á þessu tímabili og eiga mikið hrós skilið. Umgjörðin í kringum liðið er fyrsta flokks og stemningin á leikjum í Mosfellsbæ er mögnuð. Við erum gífurlega þakklátir fyrir að eiga frábæra stuðningsmenn og erum staðráðnir í að halda áfram að bæta liðið og taka skref fram á við næstu árin,” sagði Maggi eftir undirskriftina.