Þann 29. ágúst síðastliðinn var kveðinn upp dómur í Héraðsdómi Reykjaness yfir manni sem ákærður var fyrir ofbeldi gegn dóttur sinni. Ákæruliðir voru tveir og og voru um tvö og hálft ár á milli atvikanna, sem er lýst svo í ákæru:
„1. Þriðjudaginn 30. ágúst 2016, veist með ofbeldi að dóttur sinni, A, kt. 000000- 0000, á heimili þeirra að […], og slegið hana í andlit og því næst elt hana inn í
svefnherbergi og sparkað í efri búk hennar, allt með þeim afleiðingum að A hlaut sprungna vör, roða og eymsli í kringum rifbein.
2. Þriðjudaginn 26. mars 2019, að […], hótað dóttur sinni, A, kt. 000000-0000, svo miklum barsmíðum að hún gæti ekki andað fyrir blóði ef hún færi ekki inn í herbergi sitt og í kjölfarið hótað syni sínum, B, kt. 000000-0000, barsmíðum, en hótanirnar voru til þess fallnar að vekja ótta um líf, heilbrigði og velferð A og B.“
Maðurinn neitaði alfarið sök og sagði ásakanirnar runnar undan rifjum fyrrverandi eiginkonu sinnar sem hefði heilaþvegið börnin í heift sinni yfir því að maðurinn hefði byrjað með annarri konu.
Héraðsdómur taldi framburð mannsins ekki trúverðugan auk þess sem framburður dóttur hans, sem kærði hann til lögreglu, var studdur framburði ýmissa vitna, t.d. bróður hennar og nokkurra vinkvenna hennar sem hún trúði fyrir frásögnum af ofbeldi á heimilinu.
Var maðurinn fundinn sekur samkvæmt ákæru og dæmdur í átta mánaða skilorðsbundið fangelsi. Hann var jafnframt dæmdur til að greiða dóttur sinni eina milljón króna í miskabætur og syni sínum 400 þúsund krónur.
Dóminn má lesa hér.
