Tveir menn voru þann 24. ágúst sakfelldir í Héraðsdómi Reykjaness fyrir líkamsárásir.

Annar maðurinn var ákærður fyrir að hafa aðfaranótt laugardagsins 2. júlí 2022 ráðist á mann á gangstétt í Reykjanesbæ og slegið hann með hægri hendi í andlitið með þeim afleiðingum að maðurinn hlaut brot á nefbeini og skurð á nefi, sem og skurð á milli augabrúna. Einnig bólgur, eymsli og höfuðverk.

Báðir mennirnir voru ákærðir fyrir líkamsárás á dansgólfi skemmtistaðar í Reykjanesbæ. Annars þeirra sló mann í andlitið með þeim afleiðingum að sá féll í gólfið og missti meðvitund.

Sá fyrrnefndi var einnig sakaður um árás á dansgólfinu er hann ýtti með rassi sínum í mann þar og sló viðkomandi í kjöflarið í andlitið, svo sá missti jafnvægið og hrasaði.

Hrósað fyrir dugnað

Mennirnir játuðu báðir sök fyrir dómi samkvæmt ákæru og lýstu yfir iðrun. Þeir lögðu jafnframt fram vottorð frá vinnuveitendum sínum fyrir dómi þar sem borið er lof á þá fyrir dugnað og góða framkomu í starfi.

Annar maðurinn var dæmdur í fjögurra mánaða skilorðsbundið fangelsi og til greiðslu 620 þúsund króna í miskabætur. Hinn maðurinn var dæmdur í 45 daga skilorðsbundið fangelsi og til greiðslu rúmlega hálfrar milljónar í miskabætur.

Dóminn má lesa hér.