Albert Guðmundsson, landsliðsmaður og leikmaður Genoa á Ítalíu, hefur sent frá sér stutta yfirlýsingu í kjölfar ásakana um kynferðisbrot. Þetta kemur fram á vef RÚV og Vísis.

Vanda Sigurgeirsdóttir, formaður KSÍ, sagði í samtali við DV í gær að sambandið hefði fengið ábendingu um að búið væri að kæra landsliðsmann í knattspyrnu fyrir kynferðisbrot.

DV sagði frá því að um væri að ræða Albert, en brotið á að hafa átt sér stað á Íslandi í sumar.

Það kom fram í ítölskum miðlum í gær að Albert hafi neitað sök við stjórnarmenn Genoa. Yfirlýsing Alberts í dag er svohljóðandi:

„Ég er saklaus af þeim ásökunum sem komið hafa fram. Ég mun ekki tjá mig frekar á meðan málið er til rannsóknar.“

Samkvæmt reglum KSÍ má ekki velja leikmann í landsliðsverkefni á meðan mál sem þetta er á borði lögreglu.

Albert snéri aftur í íslenska landsliðið í sumar þegar Age Hareide tók við þjálfun liðsins en Albert hafði ekki verið í hópnum í heilt ár.

Albert er 26 ára gamall en hann var í byrjunarliði Genoa í leik í efstu deild á Ítalíu um liðna helgi. Albert hefur á ferli sínum leikið í Hollandi og nú á Ítalíu í átján mánuði.