Ellefu ára stúlku var neitað um að taka þátt í pítsuveislu í Fellaskóla þar sem hún er ekki í mataráskrift hjá Reykjavíkurborg. Þetta kemur fram í frétt Fréttablaðsins í dag. Stúlkan var ekki í mataráskrift, og engu skipti þó að stúlkan hefði boðist til að borga fyrir sneiðina, engin pítsa var í boði.

Móðir stúlkunnar er af erlendu bergi brotin og sendir hana alla jafna með nesti í skólann að því er fram kemur í Fréttablaðinu. Hún vildi þó gera á því undantekningu og leyfa henni að taka þátt í hátíðahöldunum á öskudag þar sem pítsur voru á boðstólum í tilefni dagsins.

Stúlkan fór því með fimm hundruð krónur í skólann og spurði hvort hún mætti kaupa eina pítsusneið. Henni var neitað um það í mötuneytinu.

Stúlkan lét þó ekki deigan síga og ákvað að fara og spyrja skólastjórann, Sigurlaugu Hrund Svavarsdóttur, hvort ekki væri hægt að gera undantekningu bara þennan dag og leyfa henni að kaupa sneiðina, en fékk aftur neitun.

Sigurlaug Hrund staðfesti þetta í viðtali við Fréttablaðið og útskýrði að aðeins nemendur sem eru í mataráskrift borði mat frá mötuneytinu.

Allir nemendur í grunnskólum borgarinnar hafa aðgang að hádegismat í skólanum.

Enginn sveigjanleiki er í kerfinu þegar kemur að mataráskrift, sem kostar 355 krónur. Ekki er í boði að borga stakar máltíðir.

Í Fréttablaðinu segir móðir stúlkunnar að hún hafi ekki áttað sig á reglunum um áskrift, hún sagðist þó spyrja hvort ekki væri hægt að líta framhjá stífum reglum af góðvild.