Ónefndir gamlir leigubílstjórar og atvinnurekendur eru sakaðir um klámfengið og niðrandi tal í Breiðholtslaug. Þetta kemur fram í umræðum í íbúahópi á Facebook. Málshefjandi segir:

„Ég og konan mín fórum í laugina um fjögur leytið í gær og okkur blöskraði munnsafnaður eldri manna sem voru í pottinum þeir töluðu niður til kvenna og dáðust af brjóstum þeirra. Skilst að þetta séu gamlir leigubílstjórar og atvinnurekendur þessir menn þurfa að hugsa sinn gang.“

Margir sem taka þátt í umræðunum kannast við þessa menningu sem virðist hafa myndast í Breiðholtslauginni. Ein kona segir:

„Þetta hefur liðist þarna í mjög langan tíma. Hef nokkrum sinnum látið þessa durga heyra það.“

Málshefjandi segir þá að kona ein hafi skammað  þessa „herramenn“ á meðan heimsókn hans og konu hans í laugina stóð.

Ekki kannast þó allir við þetta og ein kona segir:

„Við hjónin förum daglega í sund og höfum aðeins hitt háttvísa herra og dömur. Umræður snúast aðallega um það sem er efst á baugi í þjóðfélaginu.“

Samkvæmt því sem aðrir segja tíðka mennirnir, sem eru með vafasamt tal í heitapottinum, helst að hittast þar milli kl. 15 og 17 virka daga. Einn þátttakandi í umræðunum vill sýna mönnunum skilning og segir:

„Það eina sem hægt er að greina úr þessu er að „eldri menn“ (sem ætti ekki að skipta neinu máli) eru að hrósa líkamsbyggingu kvenna í sundi. Það hafa allir rétt á því að hafa skoðanir á því sem því ber fyrir sjónir, sérstaklega þar sem talað er jákvætt um viðkomandi. Allt annað sem kvartað er yfir í þessari grein er einstaklingsbundið og þyrfti að útskýra nánar, því atvinnugrein og aldur hefur ekkert með þetta mál að gera. Það sem einum finnst vera ljótur munnsöfnuður er eins og guðs orð hjá öðrum, við erum eins misjöfn og við erum mörg. Það sem ég les út úr þessu er að greinarhöfundur hefur meiri þörf fyrir að gagnrýna og dæma en að horfa á það jákvæða og góða“