Erlend kona var í morgun, í Héraðsdómi Reykjaness, dæmd í 22 mánaða fangelsi fyrir stórfellt fíkniefnabrot.
Konan var ákærð fyrir að hafa flutt inn til landsins tæplega 2,2 kíló af kókaíni sem hafði 75-79% styrkleika, með flugi frá Barcelona til Keflavíkur, þriðjudaginn 6. júní síðastliðinn. Efnin voru falin í fjórum pakkningum sem límdar voru við fætur konunnar.
Konan játaði brot sín, samkvæmt ákæru, skýlaust fyrir dómi. Samkvæmt sakavottorði hefur hún ekki áður orðið uppvís að refsiverðri háttsemi. Einnig er henni virt til refsilækkunar að hún aðstoðaði lögreglu við að upplýsa málið, m.a. upplýsti hún um tengsl annarra við brotið. „Á hinn bóginn verður ekki framhjá því horft að ákærða flutti
til landsins verulegt magn af sterku kókaíni, sem ætlað var til söludreifingar hér á landi,“ segir hins vegar í dómnum.
Til frádráttar 22 mánaða fangelsisvist kemur gæsluvarðhald konunnar frá 6. júní síðastliðnum.
Dóminn má lesa hér.
