Ath: Fréttin hefur verið uppfærð neðst og málið skýrt. Ríkissjóður er ekki að kaupa umræddar fasteignir.
Spurningar hafa vaknað um hvort ríkissjóður sé að kaupa í stórum stíl eignir sem leigufélagið Heimstaden er að selja. DV fékk í morgun send gögn sem virðast vera skjáskot úr fasteignaskrá. Þar er Heimstaden skráð eigandi fjölda íbúða að Ásbrú en undir Heimstaden stendur daufletrað: „Ríkissjóður Íslands – Dagbókarfært“.
Allmörg dæmi eru um að ríkisstjóður hafi í gegnum Vinnumálastofnun tekið íbúðir að Ásbrú á leigu og hýst hælisleitendur í þeim. Ekki hefur áður heyrst um kaup ríkissjóðs á þessum eignum.
Þingmaðurinn Björn Leví Gunnarsson (Píratar) hefur fengið sömu eða sambærileg gögn og fyrirspurn um hvort ríkissjóðir sé að kaupa íbúðir af Heimstaden. Hefur hann sent fjárlaganefnd fyrirspurn umálið. Björn segir á Facebook-síðu sinni:
„Ég var að fá spurningu um hvort ríkissjóður væri að kaupa um 170 íbúðir af Heimstaden á Ásbrú. Ég kem af fjöllum því ég hef ekkert heyrt um þetta í fjárlaganefnd og kannast ekki við þessa fjárheimild. Ég sendi því fyrirspurn á fjárlaganefnd um þetta.“
Fyrir neðan birtir Björn Leví skjáskot af fyrirspurn sinni til fjárlaganefndar:
Samkvæmt frétt Samstöðvarinnar um málið er Heimstaden enn eigandi þessara íbúða og ríkissjóður hefur ekki keypt þær. Fékk Samstöðin eftirfarandi skýringar hjá Sýslumanni:
„Hjá Sýslumanninum á Suðurnesjum fékkst loksins skýring á málinu. Það liggur enginn kaupsamningur fyrir og er Heimstaden enn eigandi þessa íbúða. Staðreyndin er sú að verið er að skrá inn gömul þinglýsingaskjöl frá fimmta áratugnum og þess vegna birtast upplýsingar um dagbókafærð eigendaskipti á Fasteignaskrá.
Þessi skráning er gerð til að tryggja rafræna skráningu réttra lóðaeigenda, ýmissa þinglýstra kvaða og lóðaréttinda. Það þarf að skrá þetta inn handvirkt fyrir hverja íbúð og vegna sumarleyfa hjá Sýslumanninum á Suðurnesjum gengur verkið hægar en ella, því ein kona var að handskrá þessar upplýsingar og það tæki hana jafnvel heilan dag að skrá eina blokk.“
