Það vakti mikla athygli um helgina þegar Andre Onana, nýr markvörður Manchester United, baunaði á Harry Maguire í æfingaleik gegn Dortmund í Bandaríkjunum.
Leiknum lauk 3-2 fyrir Dortmund og skoruðu Diogo Dalot og Antony mörk United. Donyell Malen skoraði tvö mörk fyrir Dortmund en Youssoufa Moukoko eitt.
Harry Maguire var í byrjunarliði United og spilaði fyrsta klukkutímann en í stöðunni 2-1 fyrir Dortmund var Andre Onana, nýr markvörður United sem kom frá Inter í sumar, allt annað en sáttur við varnarleik hans þegar Dortmund komst í færi.
Óhætt er að segja að Onana hafi hraunað yfir Maguire. Markvörðurinn ræddi atvikið við fjölmiðla.
„Ég ætlast til mikils af liðsfélögum mínum og þeir ætlast til mikils af mér,“ segir hann.
„Ég mun krefjast mikils frá þeim því þeir eru frábærir leikmenn. Það er heiður að spila með þessa varnarmenn fyrir framan mig.“
Onana hrósar Maguire í hástert.
„Maguire er frábær leikmaður og einn af leiðtogum liðsins. Hann er góður á boltann svo það er eðlilegt að ég krefjist mikils af honum. Hann er mjög góður og frábær náungi. Við eigum gott samband.
Við erum í þessu saman og mistök munu eiga sér stað. Við þurfum ekki að vera hræddir við að gera mistök því þau eru hluti af lífinu og við lærum af þeim.“
Onana er stórhuga fyrir tímann framundan hjá United.
„Ef við viljum vinna titla verðum við að setja pressu á okkur.“
