Þeim fjölgar sem lýsa því yfir að biskup Íslands, Agnes M. Sigurðardóttir, sitji umboðslaus í embætti. Samkvæmt reglum um biskupskjör er kjörtími hennar liðinn og efna hefði átt til biskupskjörs á þessu ári. En hún situr í  krafti 28 mánaða ráðningarsamnings sem undirmaður hennar, framkvæmdastjóri Biskupsstofu, gerði við hana í fyrra.

Jón Steinar Gunnlaugsson, fyrrverandi hæstaréttardómari, sagði í viðtali við Vísir.is í gær að ekki hefði verið lagaheimild fyrir framlengingu ráðningar Agnesar. „Þessi framganga kirkjuyfirvalda vekur upp hugsanir um það hvort að stofnanir þjóðfélagsins séu hættar að fara eftir lögum. Mér finnst þetta þungt áhyggjuefni,“ sagði Jón.

Í viðtali við Morgunblaðið í dag upplýsir Drífa Hjartardóttir, forseti Kirkjuþings, um furðulega staðreynd. Drífa framlengdi skipunartíma biskups um eitt ár í fyrra í krafti nýrra reglna um biskupskjör. Samkvæmt eldri reglum rann skipunartími Agnesar úr árið 2022. En í krafti nýrra reglna um sex ára skipunartíma framlengdi Drífa skipunina um eitt ár. Á þeim tíma hafði Agnes þegar gert fyrrnefndan samning við undirmann sinn.

Í frétt Morgunblaðsins segir: „Sam­kvæmt fram­an­sögðu virðist engu lík­ara en að sr. Agnes sjálf hafi tekið sér sjálf­dæmi um starfs­lok sín, enda kem­ur fram í svari kjör­stjórn­ar við bréfi for­sæt­is­nefnd­ar að það sé ekki í valdi kjör­stjórn­ar að ákveða fram­leng­ingu á þjón­ustu­tíma bisk­ups eft­ir að fram­leng­ing starfs­tíma hans til 1. júlí sl. var ákveðin, en „af bréfi for­sæt­is­nefnd­ar dags. 28. fe­brú­ar sl. má ráða að nefnd­in fall­ist á með bisk­upi að umboð hans/þ​jón­ustu­tími fram­leng­ist um eitt ár, þ.e. til 1. júlí 2024“, seg­ir þar.“

Síðan spyr Mogginn Drífu hvort Agnes hefði sótt fast við hana að starfstíminn yrði framlengdur á ný. Drífa svarar:

„Nei, hún vildi ekk­ert ræða þetta meira við mig. For­sæt­is­nefnd kirkjuþings fór til henn­ar í haust fyr­ir kirkjuþingið og við sögðum henni að við mynd­um ekki gera neitt í þess­um mál­um henn­ar og ekki hafa neitt frum­kvæði í því. Hún samþykkti það. Síðan kom það mér al­veg í opna skjöldu að á sama tíma og ég var að hjálpa henni í fyrra að fram­lengja skip­un­ar­tíma henn­ar um eitt ár, þá er þessi ráðning­ar­samn­ing­ur gerður og hún læt­ur mig ekki vita af því. Það finnst mér mjög ein­kenni­legt, því þetta var á sama tíma og ég var að gera þetta fyr­ir hana.“

Sjá einnig: Biskupsmálið vekur furðu – Situr Agnes ólöglega í embætti? – Kjörstjórn taldi sér ekki fært að framlengja þjónustutíma hennar