Tómas Guðbjartsson læknir bendir á að á meðan hver stórborgin á fætur annarri úti í heimi banni komur skemmtiferðaskipa þá séu Íslendingar að fjölga komum þeirra, nú síðast Reykjanesbær. „Hvaða rugl er það?“ spyr læknirinn í pistli sem hann birti á Vísir.is.

Tómas segir ennfremur:

„Ný skýrsla sýnir að þau rúmlega 200 skemmtiferðaskip sem sigla á milli hafna í Evrópu mengi meira en einn milljarður bifreiða! Sjálfur varð ég vitni að miklu mengunarskýi úr skemmtiferðaskipi yfir miðbæ Akureyrar nýlega – sem rataði réttilega í fréttir.“

Tómas segir að ferðamenn sem koma með skemmtiferðaskipum skilji litlar tekjur eftir sig og valdi miklu álagi á innviði. Auk þess skaði þeir ímynd landsins sem ferðamannalands:

„Við ættum að leggja áherslu á aðra tegund ferðamennsku á Íslandi sem er ekki jafn mengandi, og skilur meira eftir sig. Þessir ferðamenn kaupa sjaldan gistingu og borða oftast um borð. Síðan er ekkert eðlilegt að dæla inn á nokkrum klukkustundum, tvöfalt fleiri ferðamönnum en sem nemur íbúafjölda bæja eins og Ísafjarðar – og mörgum þeirra hætt að lítast á blikuna.

Innviðir okkar þola þetta illa og álag á heilbrigðiskerfið eykst. Hafnargjöld, minjagripaverslun og aðkeypt þjónusta vega ekki upp það neikvæða álag og ímynd sem skapast af svona spúandi fljótandi mengunarvöldum.“