Heimildin greindi frá því fyrr í dag að máli Gísla Jökuls Gíslasonar, sem starfar sem rannsóknarlögreglumaður hjá Lögreglunni á höfuðborgarsvæðinu hefði verið vísað til héraðssaksóknara. Fram kemur að það sé Lögreglustjórinn á höfuðborgarsvæðinu, Halla Bergþóra Björnsdóttir, sem vísaði málinu þangað.
Gísli sendi listamanninum Oddi Eysteini Friðrikssyni, sem gengur undir listamannsnafninu Odee, tölvupóst þar sem hann þóttist vera sjálfstætt starfandi blaðamaður. Ætlun Gísla var að afla nánari upplýsinga um gjörninginn „We‘re Sorry.“ Gjörningurinn gekk í meginatriðum út á að Odee setti upp heimasíðu í nafni sjávarútvegsfyrirtækisins Samherja þar sem beðist var afsökunar á meintum brotum fyrirtæksins.
Gísli leitaði ekki heimildar fyrir þessari upplýsingaöflun hjá yfirmönnum sínum og skráði ekki samskiptin við Odee í málakerfi lögreglunnar. Hann sendi tölvupóstinn þó úr netfangi sínu hjá lögreglunni.
