Þann 23. júní síðastliðinn var Ásgeir Arnór Stefánsson sakfelldur í Héraðsdómi Reykjavíkur fyrir skattsvik í rekstri fyrirtækisins Örk bygg ehf. Vanskil fyrirtækisins á staðgreiðslu skatta af launum starfsmanna þess námu nokkuð yfir 80 milljónum króna. Ásgeir játaði brot sín fyrir dómi og var dæmdur 14 mánaða skilorðsbundið fangelsi. Hann var jafnframt dæmdur til að greiða rúmlega 152 milljónir í sekt í ríkissjóð og geri hann það ekki innan fjögurra vikna frá uppkvaðningu dómsins þarf hann að sæta fangelsi í eitt ár.
Fyrirrennari félagsins Örk bygg, Örk, kom mikið við sögu í fréttum árið 2016 vegna kranaslyss í miðbænum. Var þar um að ræða stórhættulegt atvik og mildi að ekki urðu slys á fólki. Í frétt DV frá árinu 2016 segir:
„Allt var með kyrrum kjörum í miðborg Reykjavíkur morguninn 29. september árið 2016. En rónni var raskað þegar byggingarkrani, sem staðsettur var í Hafnarstræti, hrundi rétt fyrir hádegi. Timburhlaðinn kraninn féll á nýbyggingu og yfir á planið hjá pylsusölunni Bæjarins bestu. Þeir sem sáu slysið sögðu hann hafa fallið saman og ótrúlegt lán að fáir hafi verið á ferð á svæðinu. Vanalega eru tugir í röð hjá Bæjarins bestu á þessum tíma en af einhverjum ástæðum var enginn í röðinni þegar kraninn féll. Síðan þá hefur lítið frést af málinu en því er þó ekki lokið.“
Skömmu eftir slysið lýsti Eyjólfur Sæmundsson, fyrrverandi forstjóri Vinnueftirlitsins, sem nú er látinn, því yfir að grunur léki á því að átt hefði verið við öryggisbúnað kranans til þess að hægt væri að stafla meira efni á hann. Oddur R. Ólafsson, hjá vinnuvéladeild Vinnueftirlitsins, tók dýpra í árinni og sagði við DV, aðspurður um hvort málið yrði kært: „Það er alveg á kristaltæru. Þetta er tilraun til manndráps.“
Ásgeir, hjá Örk, sagði hins vegar að ástæður slyssins væru fyrst og fremst vandamál í búnaði kranans. Hann sagði að auki: „Ég sendi mína pólsku stráka á krananámskeið hjá Vinnueftirlitinu. Hans mannlegu mistök hefðu sennilega ekki orðið svona stór ef honum hefði verið kennt almennilega á kranann.“
Málið kom ekki til kasta dómstóla en Örk var úrskurðuð til að greiða 11 milljónir króna vegna eyðileggingar kranans, kvists sem kýldist niður í húsið og upphífingar á brakinu. Ásgeir sagði á sínum tíma við DV: „Ellefu milljónir er mikið fyrir lítið fyrirtæki. Ég hef hugsað um að kæra, en ég hef ekki gert það því að dómsmál geta farið á hvorn veginn sem er. Ég var alltaf mjög ósáttur við þetta.“
