Skemmdarverk gætu verið framin á sæstrengnum, sem er lífæð okkar Íslendinga, eða orkuverum og tölvukerfum hér á landi.

Pútín gæti ákveðið að hefna sín á okkur íslendingum vegna þeirrar ákvörðunar Þórdísar Kolbrúnar Reykfjörð Gylfadóttur, utanríkisráðherra, að loka sendiráði Íslands í Moskvu og reka meirihluta starfsliðs sendiráðs Rússa hér á landi heim, skrifar Ólafur Arnarson í dagfarapistli á Hringbraut.

Dagfari bendir á að Rússar hafi í gegnum tíðina verið mikilvæg bandalagsþjóð okkar í viðskiptum. Þeir hafi keypt mikið af fiskafurðum sem ekki hafi átt greiðan aðgang að öðrum mörkuðum g þyki það vafalaust kaldar kveðjur að dvergríkið Ísland gengi fram fyrir skjöldu í gagnrýni á voðaverk þeirra í Úkraínu sem þeir raunar neita að kannast við.

Dagfari bendir á að ekkert annað ríki hafi stigið það skref sem utanríkisráðherra hafi stigið með því að loka sendiráðinu í Moskvu. Þá segir hann allt benda til þess að ákvörðunina hafi utanríkisráðherra tekið án nokkurs samráð við nokkurn aðila innan eða utan ríkisstjórnar. Hann veltir því upp að ef þetta hefði verið kynnt í ríkisstjórn hefðu ráðherrar VG, sósíalistarnir, jafnvel beitt neitunarvaldi til að styggja ekki vini sína í austri.

Dagfari bendir á að þrátt fyrir aðild okkar að NATO hafi bandalagið engan varnarviðbúnað hér á landi og gæti ekki komið í veg fyrir skemmdarverk á viðkvæmum innviðum. Ákvörðun utanríkisráðherra kunni því að vera feigðarflag eitt.