Á föstudaginn var kveðinn upp dómur í mjög óvenjulegu máli við Héraðsdóm Reykjavíkur. Um var að ræð einkamál þar sem Bandaríkjamaðurinn og skákmaðurinn Noah Siegel, stefndi Páli G. Jónssyni, sem oftast er kenndur við verslun sína Polaris, og krafðist riftunar á kaupum á forláta taflborði.

Siegel keypti taflborð, taflmenn og skákklukku af Páli árið 2012 en munirnir tengjast allir einvígi aldarinnar, þ.e. heimsmeistaraeinvíginu árið 1972, sem haldið var í Laugardalshöll en þar áttust við Bandaríkjamaðurinn Robert Fisher og Sovétmaðurinn Boris Spassky.

Nokkur falleg skákborð voru hönnuð og smíðuð í tilefni einvígisins en Páll keypti suma af skákmunum einvígisins af Skáksambandi Íslands árið 1975 til að styrkja fjárhagsstöðu þess sem var á þeim tíma mjög bágborin. Siegel keypti síðan umrætt taflborð af Páli undir þeim formerkjum að það hefði verið notað í einvíginu. Árið 2021 telur hann sig síðan hafa komist að því að skákborðið var ekki á meðal þeirra borða sem Fisher og Spassky tefldu á þó að það hafi verið smíðað í tengslum við einvígið. Vildi hann því rifta kaupunum.

Siegel greiddi Páli 185.000 dollara fyrir skákborðið árið 2012, eða andvirði um 27 milljóna íslenskra króna. Hann vildi skila borðinu og fá summuna endurgreidda með vöxtum.

Í dómi Héraðsdóms Reykjavíkur er saga taflborðsins og annarra muna sem hannaðir voru í kringum skákeinvígið fræga rakin nokkuð ítarlega. Er það niðurstaða dómsins að skákborð þetta hafi ekki verið notað í einvígisskákum Fishers og Spasskys. Hins vegar telur dómurinn Siegel hafa þá sönnunarbyrði að sýna fram á að Páll hafi ekki verið í góðri trú um uppruna borðsins þegar hann seldi honum það. Er það niðurstaða héraðsdóms að ekki sé sannað að Páll hafi ekki vitað að borðið var í raun ekki notað í einvíginu.

Páll G. Jónsson er því sýknaður af kröfum Noah Siegel og Bandaríkjamaðurinn þarf auk þess að greiða honum 2,4 milljónir króna í málskostnað.