Fyrir skömmu létu bandarísk stjórnvöld undan þrýstingi og heimiluðu að Úkraínumenn fái F-16 orustuþotur til að nota í stríðinu gegn rússneska innrásarliðinu. . Þeir höfðu lengi biðlað til Vesturlanda um að fá orustuþotur en það var ekki fyrr en nýlega sem orðið var við þessum óskum þeirra.

Nokkur Evrópuríki hafa boðist til að sjá um þjálfun úkraínskra flugmanna á þessa tegund véla. Margir binda miklar vonir við að vélarnar muni koma að mjög góðu gagni við að hrekja rússneska innrásarliðið frá Úkraínu.

En Mark Milley, hershöfðingi og æðsti yfirmaður bandaríska hersins, sagði nýlega á fréttamannafundi í Pentagon að þrátt fyrir að nú megi gefa Úkraínu F-16 vélar þá verði þær ekki „töfravopn“ fyrir úkraínska herinn.

„Rússar eiga 1.000 orustuþotur af fjórðu og fimmtu kynslóð og ef þú vilt etja kappi við þá í lofti þá hefurðu þörf fyrir töluverðan fjölda fjórðu og fimmtu kynslóðar orustuþota,“ sagði hann.

Hann sagði einnig að stuðningur Vesturlanda við Úkraínu til að styrkja varnir gegn rússneskum flugskeytum og orustuþotum hafi verið besta lausnin til þessa. Hann sagði að bandarísk stjórnvöld styðji þó heilshugar þau NATO-ríki sem ætla að annast þjálfun úkraínsku flugmannanna og hugsanlega gefa Úkraínu F-16 vélar.

Hann útskýrði síðan af hverju Bandaríkjamenn hefðu beðið svo lengi með að gefa grænt ljós á að Úkraínumenn fengju F-16 vélar.  Ástæðan er fjárhagslegs eðlis. „Ef við horfum á F-16 vélarnar þá kosta 10 slíkar einn milljarð dollara og viðhald þeirra kostar einn milljarð til viðbótar, svo við tölum um tvo milljarða dollara fyrir 10 vélar,“ sagði hann.

Hann sagði að ef Úkraínumenn hefðu fengið F-16 fyrr hefði það tekið stóran hluta af fjármögnun annars útbúnaðar sem þeir hafa fengið, til dæmis skotfæra, flugskeyta, loftvarnarkerfa, brynvarinna ökutækja og skriðdreka.