Sveinn Andri Sveinsson, hæstaréttarlögmaður, mun sjá um skipti á félaginu ÁBE ehf. sem úrskurðað var gjaldþrota þann 2. maí síðastliðinn samkvæmt auglýsingu í Lögbirtingablaðinu.

Umrætt félag var utan um rekstur nikótínpúðaverslunarinnar Vörin sem staðsett var á Dalvegi 16b í Kópavogi og opnaði með pompi og prakt í byrjun júlí 2021.

Tónlistar- og athafnamaðurinn Árni Páll Árnason, betur þekktur sem Herra Hnetusmjör, var andlit verslunarrekstursins og stóð á bak við félagið ásamt viðskiptafélögum sínum Elvari Loga Rafnssyni og Birni Ragnari Björnssyni.

Ætlunin var að ná í sneið af þeim ört vaxandi markaði sem nikótínpúðabransinn var á þeim tíma hérlendis og var verkefnið metnaðarfullt í alla staði. Mikið úrval af vörum sem og smakkbar þar sem hægt var að prófa mismunandi púða og brögð.

„Þakklátur fyrir að fá tækifæri til að opna mína eigin nikotinpúðabúð og stækka veldið,“ skrifaði Herra Hnetusmjör á Instagram-síðu sína við opnun verslunnar en hann hefur ekki farið leynt með þær fyrirætlanir sínar að verða moldríkur. Auk útgáfu tónlistar og tónleikahalds, þar sem hann gerir það afar gott, hefur listamaðurinn meðal annars gefið út bók og opnað skemmtistað auk verslunarrekstursins á Dalvegi.

En þetta tiltekna ævintýri gekk ekki upp og Vörin varð undir í samkeppninni á markaðinum sem afar hörð. Fastlega má þó búast við því að Herra Hnetusmjör sé hvergi að baki dottinn enda veit hann sem er að þeir fiska sem róa.

Eins og áður segir mun það koma í hlut Sveins Andra Sveinssonar að gera þrotabúið upp en hann er einn reynslumesti skiptastjóri landsins og hefur  undanfarin ár komið að afar flóknum verkefnum eins og uppgjöri WOW sem og EK1923, áður heildverslun Eggerts Kristjánssonar.