Samkvæmt reglunum þá eiga lögreglumennirnir framvegis að vera vel rakaðir þegar þeir eru við störf. Raunar svo vel rakaðir að þeir mega ekki vera með neitt skegg.
Sky News segir að reglunum sé ætlað að tryggja að auðveldara sé fyrir lögreglumenn að nota PPE-andlitsgrímur.
En lögreglumenn eru allt annað en sáttir við þetta. Kvörtunum hefur rignt inn til stéttarfélags skoskra lögreglumanna og sagði David Kennedy, formaður samtakanna, að öryggisbúnaður á borð við andlitsgrímur eigi að vera síðasta úrræðið sem gripið sé til og því séu margir undrandi á að einhverjum detti í hug að setja reglur af þessu tagi.
Rúmlega 16.500 manns starfa hjá skosku lögreglunni og er hún næst fjölmennasta lögregluembætti landsins. Aðeins Lundúnalögreglan er fjölmennari.
Auk allra kvartananna hafa fjórir lögreglumenn höfðað mál fyrir dómi gegn lögreglunni vegna reglnanna.
En eins og alltaf þá eru engar reglur án undantekninga og það á auðvitað við um þessar reglur.
Til dæmis mega lögreglumenn láta hjá líða að raka sig ef trúarskoðanir þeirra krefjast þess, einnig ef menningarlegar ástæður eru til staðar og ef læknisfræðilegar ástæður eru til staðar.
Alan Speirs, aðstoðaryfirlögregluþjónn, sagði að öryggi lögreglumanna sé algjört forgangsatriði og nýju reglurnar séu til þess gerðar að tryggja öryggi lögreglumanna sem starfa í á götum úti. Hann sagði að heimsfaraldur kórónuveirunnar hafi kennt lögreglunni að það sé auðveldast að nota andlitsgrímur, sem falla alveg að andlitinu, þegar notendurnir eru nauðrakaðir.
