Kristján Einar Sigurbjörnsson sjómaður, oft kallaður Kleini, var dæmdur í tæplega fjögurra ára fangelsi á Spáni í nóvember í fyrra fyrir ofbeldisfullt rán í Malaga.

Heimildin fjallar ítarlega um dóminn í nýjasta tölublaði sínu. Í umfjölluninni kemur fram að dómurinn, þriggja ára og níu mánaða fangelsi, hafi verið skilorðsbundinn til þriggja ára. Kristján sat í varðhaldi í átta mánuði áður en honum var sleppt í nóvember síðastliðnum.

Heimildin bendir á að Kristján Einar hafi komið fram í viðtölum eftir að hann kom til Íslands og sagt að hann hefði ekki gert neitt af sér sem verðskuldaði fangelsi.

Raunin er þó önnur ef marka má dóminn sem Heimildin fjallar um. Kristján og annar maður, Odin K.F., réðust að tveimur einstaklingum og rændu þeir annað fórnarlamb sitt og gerðu tilraun til að ræna hitt. Brotin voru framin síðla nætur og er tekið fram að Kristján og Odin hafi verið undir áhrifum fíkniefna.

Í dómnum er atvikum lýst en fyrsta brot þeirra beindist að manni fyrir utan skyndibitastað í götunni Lazcano. Hrintu þeir honum utan í vegg á sama tíma og annar þeirra beindi oddhvössum hlut að kvið fórnarlambsins. Rifu þeir peningaseðla af manninum sem hann var með á sér, en um var að ræða 40 evrur. Að svo búnu hlupu þeir í burtu. Þá er ránstilrauninni gegn hinum einstaklingnum lýst.

Tekið er fram í frétt Heimildarinnar að Kristján Einar hafi játað sök í málinu.

Eins og að framan greinir hefur Kristján Einar gert lítið úr atvikinu í samtölum við fjölmiðla hér á landi. Hefur hann lýst því að um hafi verið að ræða „fyllerísslagsmál“ og hann hafi ekki gert neitt af sér sem réttlætir fangelsisdóm.