Katrín Jakobsdóttir, forsætisráðherra, segir að samstaða sé innan ríkisstjórnarinnar um þær aðhaldsleiðir í ríkisfjármálum sem verði boðaðar um miðja vikuna. Hún útilokar ekki skattahækkanir og jafnvel fækkun ríkisstarfsmanna.

Fréttablaðið skýrir frá þessu í dag og hefur eftir Katrínu að allir skilji hvað þetta þýði. „Það getur þýtt fækkun starfsmanna og það getur líka þýtt fækkun verkefna,“ hefur Fréttablaðið eftir henni.

Hún sagði að ríkisstjórnin vinni að því að sameina ríkisstofnanir og að ríkið verði að afla meiri tekna og því séu skattahækkanir ekki útilokaðar.

Óli Björn Kárason, þingmaður Sjálfstæðisflokksins, sagði að það komi honum ekki á óvart að forsætisráðherra vilji skattahækkanir. Hann sagði að álögur ríkisins séu nú þegar mun hærri en það sem geti talist hófsamt. Háir skattar dragi úr samkeppnishæfni íslenskra fyrirtækja. „Þessar hugmyndir eru ekki bara varhugaverðar, þær eru hreinlega óskynsamlegar. Auknar álögur draga líka úr getu okkar til að laða hingað starfsfólk og skapa verðmæti,“ sagði Óli Björn.

Hægt er að lesa nánar um málið í Fréttablaðinu í dag.