Vilhjálmur gerir stöðu mála í hverfinu að umtalsefni í aðsendri grein í Morgunblaðinu í dag.
„Fáir borgarfulltrúar búa í Breiðholtshverfum. Það kann ásamt öðru að skýra áhugaleysi margra þeirra á ýmsum hagsmunamálum íbúa Breiðholtshverfa og frumkvæðisleysi í umfjöllun um málefni hverfanna,” segir Vilhjálmur meðal annars.
Hann segir að það sem nú veki áhyggjur séu framkvæmdir sem fyrirhugaðar eru á svæði nálægt ánum norðan Bakka- og Stekkjahverfis.
„Óljóst er hversu þétta byggð og háa er ráðgert að byggja þar en sú byggð mun valda enn frekari aukningu á umferð norðan Bakka- og Stekkjahverfis,“ segir Vilhjálmur og bætir við að ekki liggi fyrir nákvæmlega hver afstaða borgarstjórnarflokks Sjálfstæðisflokksins til fyrirhugaðrar uppbyggingar á þessu svæði er.
„Enn fremur er mikilvægt að hann efni til íbúafundar með íbúum í Breiðholti, ekki síst í Bakka- og Stekkjahverfi og Hólahverfi, og kynni þeim fyrirhugaðar framkvæmdir og afstöðu borgarstjórnarflokks Sjálfstæðisflokksins til þessara framkvæmda,“ segir hann og brýnir sinn gamla flokk.
„Almennt þarf borgarstjórnarflokkur Sjálfstæðisflokksins að vera virkari í heimsóknum í einstaka borgarhluta, meðal annars efna til almennra íbúafunda þar sem hagsmunamál viðkomandi hverfa eru rædd – ekki einungis í fáein skipti á kjörtímabilinu heldur miklu oftar. Ekki skal lítið gert úr því sem borgarstjórnarflokkurinn hefur gert á þessum vettvangi, en gera má enn betur,“ segir hann.
