Rík hjón í Surrey á Englandi auglýsa eftir heimilishjálp til að passa kettina sína tvo og sinna léttum húsverkum. Launin sem í boði eru eru 58 þúsund pund á ári eða um 9,9 milljónir íslenskra króna.

Hjónin eru þegar með persónulegan aðstoðarmann, matreiðslumann og garðyrkjumann að störfum fyrir sig. 

Í auglýsingunni fyrir starfið segir að umsækjandinn verði að „fæða, gæta og umgangast ketti eigandanna með ástúðlegum hætti“ og er gert ráð fyrir að viðkomandi búi á heimilinu og hugsi um dýrin þegar eigendurnir eru að heiman. Hjónin sem vinna bæði úti eru að leita að reyndri húshjálp, sem verður að sýna frumkvæði og hafa auga fyrir smáatriðum.

„Viðkomandi þarf að hafa ánægju af því að reka heimilið og styðja hjónin í annasömu lífi þeirra. Skyldur fela í sér: Að tryggja að heimilið sé hreint og skipulagt daglega, þar á meðal að ryksuga, rykhreinsa, þurrka, þrífa glugga og hreinsa baðherbergi. Þurrka og pússa húsgögn og innréttingar. Þvottur og straujun á fötum og undirbúa föt fyrir fatahreinsun. Einnig að sjá til þess að fataskápar séu skipulagðir og tryggja að föt séu fersk og tilbúin til notkunar.“