Þegar Vladímír Pútín, Rússlandsforseti, sendi her sinn inn í Úkraínu fyrir rétt rúmu ári, bjuggust flestir við skjótum sigri Rússa. En það gekk ekki eftir og eru Rússar víðs fjarri því að ná þeim markmiðum sem þeir höfðu sett sér.

Margir þættir spila þar inn í. Til dæmis getuleysi rússneska hersins, lélegur búnaður, lélegir stjórnendur, spilling og lítill baráttuandi.  En einnig skiptir miklu máli að Úkraínumenn eru fullir baráttuvilja og hafa að sögn sérfræðinga beitt hernaðartækni sem stendur þeirri rússnesku langtum framar. En það sem skiptir einna mestu máli eru vopn frá Vesturlöndum.

Í nýlegri umfjöllun CNN var fjallað um þau þrjú vestrænu vopn sem hafa skipt sköpum um gang stríðsins.

Javelin er fyrsta vopnið sem nefnt er. Þetta er flugskeyti, sem er ætlað til notkunar gegn skriðdrekum. Einn maður getur borið slíkt flugskeyti og byssuna sem því er skotið úr. Hún er einfaldlega sett á öxlina, miðað og skotið. Síðan hefur notandinn tíma til að taka á sprett og forða sér á meðan flugskeytið finnur skotmark sitt.

Það, hversu auðvelt Javelin er í notkun, gerir það að frábæru vopni fyrir Úkraínumenn og hafa þeir beitt því óspart og valdið Rússum miklu tjóni með því. Vopnið kom sér sérstaklega vel á fyrstu dögum stríðsins þegar Rússar reyndu að komast inn í þéttbýli með skriðdreka sína og önnur tól. Úkraínumenn gátu þá falið sig bak við tré eða inni í húsi, skotið á Rússana og látið sig hverfa á brott áður en þeir náðu að svara skothríðinni.

HIMARS hefur heldur betur komið að góðu gagni en þetta er flugskeytakerfi sem getur skotið flugskeytum 70-80 km með mikilli nákvæmni, eða í mesta lagi 10 metra skekkju. Um 5 tonna bíl er að ræða sem er með skotpall sem getur skotið 6 flugskeytum í röð og ekki endilega á sama skotmarkið.

Með HIMARS gátu Úkraínumenn ráðist á birgðaflutningalínur Rússa langt að baki víglínunni sem og vopnageymslur þeirra og bækistöðvar. Rússar þurftu að bregðast við þessu með því að flytja bækistöðvar og vopnageymslur lengra frá víglínunni og þannig urðu birgðaflutningar þeirra erfiðari.

Bayraktat TB2 drónar frá Tyrklandi hafa komið að góðum notum í stríðinu. Þeir eru frekar ódýrir, geta borið töluvert af sprengiefni og myndavél.

Upptökur frá þeim sýna þegar þeir hafa eyðilagt brynvarin rússnesk ökutæki, stórskotaliðsbyssur og birgðaflutningalínur.

Drónarnir eru þó hægfara og því auðveldari viðureignar fyrir loftvarnasveitir Rússa.

Úkraínumenn hafa fengið 40 til 50 dróna af þessari tegund. Talið er að 17 þeirra hafi verið grandað af rússneskum loftvarnarsveitum.