Margir óttast að ef Rússar sigra í stríðinu í Úkraínu muni þeir halda landvinningum sínum áfram og að það verði ekki tilviljun hvaða lönd þeir ráðast næst á.

B.T. spurði Flemming Splidsboel, sérfræðing í rússneskum málefnum hjá dönsku hugveitunni DIIS, hvaða lönd séu líkleg sem næstu skotmörk Pútíns.

„Moldóva og Georgía eru þau augljósustu,“ sagði hann.

Hann sagði að þrátt fyrir að þetta séu lítil lönd, þá sé ekki öruggt að Rússar muni fara beint í hernaðaraðgerðir gagnvart þeim eftir stríðið í Úkraínu. „Þeir munu líklega reyna að raska jafnvæginu í löndunum áður en þeir ráðast á þau. Maður getur ímyndað sér að þeir muni efna til óeirða, óróleika og reyna að hafa áhrif á kosningar í löndunum,“ sagði hann.

Hvað varðar sigur í stríðinu í Úkraínu sagði hann að í nútíma stríði sé erfitt að vita hvort sigur vinnist eða ekki. „Ef Rússar ná til dæmis yfirráðum yfir átakasvæðunum í Úkraínu en missa 80.000 hermenn, þá held ég ekki að rússneskur almenningur muni líta á það sem sigur,“ sagði hann.

Hann sagðist ekki vera í neinum vafa um að niðurstaða stríðsins í Úkraínu sé afgerandi fyrir framtíð Rússlands.

„Ef Rússar tapa í Úkraínu munu þeir standa særðir eftir og verða að viðurkenna að þeir hafa misst afgerandi áhrif í fyrrum ríkjum Sovétríkjanna,“ sagði hann.