Leikkonan og leikstjórinn Olivia Wilde og tónlistarmaðurinn Harry Styles eru hætt saman eftir um tveggja ára samband samkvæmt erlendum miðlum.

Þar er vísað til heimildarmanna sem segja að þau hafi hætt saman í góðu. Harry sé á leið á tónleikaferðalag erlendis og Olivia ætli að einbeita sér að uppeldi barna sinna og störfum sínum í Los Angeles.

Fyrstu fréttir bárust af sambandi þeirra í janúar 2021 þegar myndir náðust af þeim að leiðast á almannafæri.  Þau reyndu að halda sambandi sínu utan sviðsljóssins en þar sem Olivia var nýskilinn við fyrrverandi eiginmann sinn og barnsföður, Jason Sudeikis, fóru fljótlega að ganga sögur um að hún hafi slitið hjónabandi sínu til að geta byrjað með Harry og höfðu margir neikvæðar skoðanir á slíkum aðstæðum.

Mikið hefur verið fjallað um samband þeirra eftir að mynd sem Olivia leikstýrði og Harry lék í, Don’t Worry Darling, kom út en mikið drama var í kringum kvikmyndina og leikarahóp hennar.

Það hjálpaði svo ekki þegar fyrrum barnfóstra Oliviu og Jason steig fram opinberlega og sakaði Oliviu um framhjáhald og að hafa dregið Jason á asnaeyrunum.

Nú hefur parið ákveðið að halda í sitt hvora áttina svo líklega er þetta endirinn á öllu dramanu. Eða hvað? Fjölmiðlar hið ytra segja að sambandsslitin séu í reynd bara pása sem þau hafi tekið frá ástarsambandinu en þau ætli áfram að vera vinir. Kannski breytast aðstæður og þau finna leið til hvors annars aftur.