Flestir vinna um 40 klukkustundir á viku, eiga frí um helgar eða á virkum dögum ef þeir þurfa að vinna um helgar, fá jólafrí, páskafrí, sumarfrí og kannski fleiri frí. Flestir ná eflaust að taka sér smá frí, kannski stutt sumarfrí en það gera hjónin Agnete Hansen og Henry Ole Larsen, sem búa í Noregi, ekki. Þau hafa ekki átt einn einasta frídag síðustu 15 árin.

Þau búa á sveitabæ í Pasvik í Norður-Noregi, örskammt frá rússnesku landamærunum. Bær þeirra stendur nærri árbakka og hinum megin við ána er Rússland.

Vinnudagur þeirra hjóna hefst klukkan 6 að morgni og lýkur ekki fyrr en seint að kvöldi. Þannig er þetta 365 daga á ári og 366 daga þegar hlaupár er.

„Við njótum hvers dags sem við eigum með dýrunum. Okkur líkar einnig við að vinna. Það veitir okkur mikla ánægju að vinna,“ sagði Agnete í samtali við Norska ríkisútvarpið.

Henry sagðist vinna 80 til 100 klukkustundir á viku og finnist það fínt.

„Þetta er ekki þess virði fjárhagslega en þetta er þess virði þegar kemur að vellíðan,“ sagði hann.

Hjónin telja að vinna þeir skipti samfélagið miklu máli því þau framleiða mat fyrir Norðmenn. „Sérhvert land, sem ber virðingu fyrir sjálfu sér, á að vera sjálfu sér nægt um mat að eins miklu leyti og hægt er. Við gerum það sem við getum til að það markmið náist,“ sagði Henry.