Mist Edvardsdóttir er gestur í nýjasta þætti Íþróttavikunnar með Benna Bó á Hringbraut. Hún mætti í settið ásamt Herði Snævari Jónssyni, íþróttastjóra Torgs. 

Mist átti magnaðan knattspyrnuferil. Nú hefur hún að öllum líkindum lagt skóna á hilluna eftir fjórða krossbandsslit ferilsins, 32 ára gömul. 

„Ég hef verið í fótbolta síðan ég var fjögurra ára. Ég veit ekki hvort maður muni nokkurn tímann finna eins mikla ástríðu fyrir einhverju. Það verður smá skrýtið núna að fylla upp í tómarúmið,“ segir Mist.  

„Ég er búinn að vera að brjóta hugann yfir hvað ég get gert til að dreifa huganum. Ég var kominn út „ég verð bara að kaupa mér hús og gera það upp“ og einhver svona vitleysa. Maður þarf að finna sér eitthvað. Ég hef mjög gaman að golfi og mig langar svolítið að taka það föstum tökum.“ 

Krossbandsslit voru ekki einu áföll á knattspyrnuferli Mistar. Hún greindist með krabbamein árið 2014. 

„Ég er sátt við minn feril í dag. Ég syrgi alveg líka hvernig hann fór, sérstaklega landsliðsferilinn. Ég greinist með krabbamein og slít í kjölfarið fjórum sinnum krossband á sex árum. En úr því sem var er ég mjög sátt með minn feril.“ 

Hún sagði nánar frá því er hún greindist með krabbamein. „Ég talaði bara við landsliðslækni. Ég fór ekki til læknis strax. Ég hitti alltaf bara lækni landsliðsins í ferðum og svona. Það er síðan í júní sem ég fæ greininguna. Það er rétt fyrir eitthvað verkefni, tvo leiki á móti Danmörku. Ég fór með liðinu út og varð eftir í Danmörku til að byrja meðferðina, fara í skanna og svona. Þær fóru heim að spila seinni leikinn.“