Reuters skýrir frá þessu og segir að nú hafi þjóðvegi einum í Joutsa verið lokað fyrir bílaumferð því hann á að þjóna hlutverki flugvallar næstu fimm dagana. Áratugir eru síðan þessum vegi var síðast lokað vegna verkefna hersins. Vegurinn liggur á milli Helsinki og norðurhluta landsins.
Þrátt fyrir að þetta hafi ekki verið gert áratugum saman þá tók það flugherinn bara nokkra daga að gera veginn kláran sem flugvöll. Vesa Mantyla, ofursti, sagði að svo lengi sem vegurinn sé í góðu standi taki ekki langan tíma að koma honum í notkun.
Um æfingu á vegum hersins er að ræða og taka um 200 manns þátt í henni. Notast verður við F/A-18 Hornet og Hawk MK51 flugvélar.
Fólk hefur safnast að veginum til að fylgjast með æfingunum.
Finnski herinn æfir notkun varaflugvalla árlega.
Mantyla sagði að atburðirnir í Úkraínu sýni að það sé rétt ákvörðun að vera með varaflugvelli sem þessa og geta þannig dreift flugvélunum á vellina. Finnar sóttu um aðild að NATO í vor ásamt Svíum og bíða þess nú að öll aðildarríki bandalagsins samþykki umsókn þeirra.
