Óhætt er að segja að Michael Close, sem býr í Denver í Bandaríkjunum, hafi reiðst mjög þegar Isabella Thallas og unnusti hennar, Darian Simon, reyndu að fá hundinn sinn til að skíta í garði Close.

Mirror segir að talið sé að Close hafi öskrað á þau út um glugga þegar hann heyrði parið segja hundinum að fara að skíta. Hann er sagður hafa sagt: „Eruð þið að þjálfa þennan helvítis hund eða bara öskra á hann?“

Því næst greip hann AK-47 byssu, sem hann hafði tekið hjá vini sínum sem er lögreglumaður í lögreglunni í Denver, og skaut 24 skotum að parinu.

Hann hæfði Thallas í bakið og lést hún á vettvangi. Hún hafði haldið upp á 21 árs afmælið sitt tveimur dögum áður.

Simon fékk skot í fótlegg og rasskinn en lifði árásina af.

Close var handtekinn síðar um daginn.

Þetta gerðist 10. júní 2020. Á föstudaginn var dómur kveðinn upp yfir Close og var hann fundinn sekur um að hafa skotið Thallas til bana. Hann á ævilangt fangelsi yfir höfði sér en tilkynnt verður um þyngd dómsins þann 4. nóvember næstkomandi.