Sky News skýrir frá þessu og segir að vísindamenn segi að sóttvarnarreglurnar hafi skarast við kynjamisrétti og hafi yfirvöld ekki tekið tillit til þess.
Margar konur hafi myndað kúlur „af nauðsyn“ áður en þeim var heimilt að gera það á löglegan hátt. Þetta gerðu þær til að þær gætu aðstoðað við barnagæslu.
Aðalhöfundur rannsóknarinnar, Joe Tomlinson vísindamaður við háskólann í York, segir að niðurstöður rannsóknarinnar bendi til að ekki hafi verið tekið nægilegt tillit til umönnunarskyldu og hvernig nýju lögin myndu hafa meiri og neikvæðari áhrif á konur og aðra hópa sem glíma við ójafnrétti.
Hann sagði að niðurstöður rannsóknarinnar hafi komið á óvart því fyrri rannsóknir hafi sýnt að karlar séu miklu líklegri til að brjóta lögin en konur. Niðurstöðurnar sýni að einbeittur brotavilji hafi ekki legið að baki brotum kvennanna heldur nauðsyn. Þær hafi myndað kúlur af nauðsyn áður en það var opinberlega heimilað.
Samkvæmt skýrslu frá bresku hagstofunni frá júlí 2020 þá sáu konur að meðaltali mun meira um barnagæslu á degi hverjum en karlar á fyrsta mánuði sóttvarnaraðgerðanna. Eftir að fólki var heimilað að mynda umgengniskúlur hafi konur, sem sinntu börnum, staðið frammi fyrir ákveðnum vanda um hverjir ættu að vera í kúlunum þeirra.
