Bardin Artem Igorevich, ofursti, var útnefndur af Vladímír Pútín og ráðamönnum í Kreml til að stýra úkraínsku borginni Berdyansk sem er í Zaporizhzhia héraðinu. Í gær var hann ráðinn af dögum með bílsprengju í borginni.

Upptaka, sem hefur gengið á  samfélagsmiðlum, sýnir bíl ofurstans í ljósum logum örskömmu eftir að sprengjan sprakk.

Igorevich var fluttur á sjúkrahús í skyndinu en lést þar af völdum áverka sinna að sögn Yaroslav Trofimov, fréttamanns Wall Street Journal, sem hafði það eftir talsmönnum rússneska hernámsliðsins í Zaporizhzhia.

Síðar sagði talsmaður hernámsliðsins í samtali við Gazeta Russiya að Igorevich væri enn á lífi og berðist fyrir lífi sínu.

Í kjölfar sprengingarinnar brutust skotbardagar út í borginni að sögn The Sun. Á myndbandsupptökum má heyra skothríð í borginni.

Úkraínumenn hafa ekki lýst yfir ábyrgð á bílsprengjunni en almennt er talið að sveitir, hliðhollar Úkraínumönnum, hafi staðið á bak við hana.

Þetta er ekki fyrsti Rússinn eða samstarfsmaður þeirra sem deyr af völdum bílsprengju. Í ágúst lést Ivan Sushko, sem starfaði með rússneska hernum og hafði verið útnefndur embættismaður í Zaporizhzhia, þegar sprengja sprakk undir bíl hans.

Í ágúst fannst úkraínskur lögreglustjóri hengdur í austurhluta landsins. Úkraínumenn hafa ráðið fjölda embættismanna á hernámssvæðunum af dögum á síðustu vikum.