Cristiano Ronaldo var í morgun orðaður við Borussia Dortmund og sagður ólmur vilja ganga til liðs við félagið.

Það er hins vegar ekkert til í því að hann gæti farið þangað, að sögn Hans-Joachim Watzke, stjórnarformanns félagsins.

Ronaldo hefur reynt að komast í burtu frá United í allt sumar, þar sem hann vill leika í Meistaradeildinni. Hann hefur verið orðaður við hvert stórliðið á fætur öðru. Fáir virðast þó til í að taka sénsinn á honum.

„Ég elska leikmanninn. Þetta er heillandi hugmynd, að sjá hann hér,“ segir Watzke.

„Það hafa hins vegar ekki verið nein samskipti okkar á milli. Við ættum að hætta að tala um þetta.“

Á dögunum sagði Ronaldo frá því að um mánaðarmót myndu allir fá að heyra sannleikann um sumar hans, sem hann segir uppfullt af lygasögum um sjálfan sig.