Mikael Nikulásson, sérfræðingur Þungavigtarinnar, telur að FH þurfi að skipta um þjálfara hjá karlaliði sínu.
Eiður Smári Guðjohnsen tók við FH fyrr í sumar af Ólafi Jóhannessyni, sem var látinn taka poka sinn fyrir slæmt gengi.
Gengi Hafnfirðinga hefur hins vegar versnað enn frekar eftir þjálfarabreytinguna. Liðið er í bullandi fallhættu.
„Það þarf að skipta um þjálfara. Þú nærð ekki að skipta leikmönnunum út,“ segir Mikael í þættinum.
FH tapaði síðasta leik gegn ÍBV, 4-1. Mikael gagnrýnir frammistöðuna í þeim leik harðlega.
„Andleysið er algjört. Þjálfararnir segjast ætla að fara í stríð. Ef þetta er stríð þá veit ég ekki hvað,“ segir hann um leikinn.
„Þetta eru einstaklingar, ekki lið. Ef ég væri þjálfari FH myndi ég segja af mér,“ segir Mikael Nikulásson, sérfræðingur Þungavigtarinnar.