Tveir Íslendingar á fimmtugsaldri hafa verið úrskurðaðir í gæsluvarðhald í Danmörku eftir alvarlega líkamsárás. Frá þessu greinir Fréttablaðið.

Árásarþoli er sagður íslenskur maður á sextugsaldri sem var í húsbíl á Rødhus Klit Camping tjaldstæðinu sem er nálægt Álaborg á Jótlandi. Átti árásin sér stað á laugardagsmorgun.

Fréttablaðið hefur heimildir fyrir því að árásin hafi átt sér stað í misheppnaðri ránstilraun. Var árásarþoli kýldur, í hann sparkað ítrekað og eins var hann skorinn með eggvopni í andlit, handlegg og fótlegg. Mun hann liggja þungt haldinn á sjúkrahúsi þar sem honum er haldið sofandi í öndunarvél. Meðal meiðsla eru höfuðkúpubrot, brot á kjálka, rifbeinum og alvarlegir áverkar á lungum.

Fréttablaðið hefur eftir starfsmanni lögreglunnar á Norður Jótlandi að árásin hafi verið það alvarleg að lífi árásarþola var ógnað.

Voru hinir grunuðu, Íslendingar sem eru 43 og 46 ára að aldri, handteknir á tveimur mismunandi stöðum á laugardag. Þeir hafa verið úrskurðaðir í gæsluvarðhald til 2. september, en báðir neita sök.

Árásarþoli er 56 ára og liggur á Háskólasjúkrahúsinu á Álaborg samkvæmt frétt Fréttablaðsins.