Barcelona hefur sagt Frenkie de Jong að þeir vilji ógilda núgildandi samning leikmannsins hjá félaginu og taka í gildi fyrri samning hans á ný. The Athletic fjallar um málið.

Börsungar vilja meina að ekki hafi allt verið með felldu þegar samningur de Jong við félagið var endurnýjaður haustið 2020. Núverandi stjórn, með Joan Laporta sem forseta, sakar fyrrum stjórn, þar sem Josep Maria Bartomeu var forseti, um glæmsamlegt athæfi í tengslum við endurnýjun samnings miðjumannsins.

Barcelona hefur reynt að losna við de Jong í sumar. Félagið vill selja hann og þar hefur Manchester United helst verið nefnt til sögunnar sem nýr áfangastaður Hollendingsins. Börsungar skulda honum hins vegar háar upphæðir í laun og er hann ekki til í að ganga burt frá þeim. Félagið hefur einnig reynt að fá de Jong til að taka á sig launalækkun.

Nú er sagt frá því að Barcelona hafi tilkynnt de Jong um miðjan síðasta mánuð að félagið hafi komist yfir sannanir þess efnis að maðkur hafi verið í mysunni þegar samningur hans var endurnýjaður í október 2020.

De Jong samþykkti þá að taka á sig launalækkun tímabilin 2020-2021 og 2021-2022. Það skilur 15,2 milljónir punda eftir til að greiða de Jong á næstu fjórum tímabilum.

Þrír aðrir leikmenn Barcelona gerðu slíkan samning við Barcelona einnig. Það eru þeir Gerard Pique, Marc-Andre ter Stegen og Clement Lenglet.