Cristiano Ronaldo hefur verið mikið í umræðunni undanfarið. Hann vill komast frá Manchester United. Nú gæti Corinthians í Brasilíu boðið honum leið út af Old Trafford.

Portúgalinn 37 ára gamli hefur verið orðaður við fjölda félaga í Evrópu í sumar. Ekkert þeirra virðist þó vera tilbúið að taka sénsinn á honum.

Ronaldo sneri aftur til Man Utd fyrir ári síðan, tólf árum eftir að hann yfirgaf félagið fyrir Real Madrid.

Man Utd olli hins vegar miklum vonbrigðum á síðustu leiktíð og hafnaði í sjötta sæti. Liðið leikur því ekki í Meistaradeild Evrópu á komandi leiktíð. Sjálfur átti Ronaldo gott tímabil. Hann skoraði 24 mörk í öllum keppnum.

„Ég á mér stóra drauma. Þetta er Corinthians. Eru ekki Willian og Renato Augusto hér? Það er allt mögulegt í fótbolta og það er skylda mín að gera mitt besta fyrir Corinthians,“ segir Duilio Monteiro Alves, forseti brasilíska félagsins.

„Ég veit ekki hvort það er möguleiki. Við höfum ekki prófað þetta eða kafað dýpra. Við höfum hins vegar auga með honum, ef hann skyldi vilja spila í Brasilíu.“