Úrskurðarnefnd lögmanna hefur áminnt lögmann fyrir að hafa brotið siðareglur stéttarinnar með því að vanrækja mjög skyldur sínar gagnvart skjólstæðingi sínum.

Morgunblaðið greinir frá þessu en úrskurð nefndarinnar má sjá hér.

Konan sem leitaði aðstoðar lögmannsins átti í deilum við ættingja sína vegna ráðstöfunar fasteignar úr dánarbúi en konan var lögerfingi hins látna.

Fyrir héraðsdómi féll lögmaðurinn frá helstu málsástæðu konunnar, sem varðaði ágreininginn um ráðstöfun á fasteigninni, án samráðs við konuna. „Ágreiningslaust er að sóknaraðili var ekki viðstödd aðalmeðferð málsins sem fram fór í Héraðsdómi þann x. mars 20xx en við munnlegan flutning málsins féll varnaraðili frá fyrrgreindri málsástæðu fyrir hönd sóknaraðila,“ segri meðal annars í úrskurði nefndarinnar um þetta.

Enn fremur vanrækti hann að áfrýja dómnum til Landsréttar en konan náði ekki sambandi við hann, þrátt fyrir ítrekaðar tilraunir, fyrr en eftir að áfrýjunafresturinn var liðinn. Konan þurfti að greiða fólkinu sem hún stefndi hálfa milljón í málskostnað.

„Að mati nefndarinnar er sú háttsemi sem varnaraðili viðhafði í lögmannsstörfum sínum í þágu sóknaraðila og hér hefur verið lýst verulega ámælisverð og ósamboðin lögmannastéttinni. Verður því ekki hjá því komist að veita varnaraðila áminningu samkvæmt 2. mgr. 27. gr. laga nr. 77/1998,“ segir í lokaorðum niðurstöðu úrskurðarnefndarinnar.