Baráttu- og aktívistahópurinn Öfgar hvatti gesti Þjóðhátíðar til að yfirgefa brekkuna á miðnætti í gær, þegar meintur gerandi kynferðisbrota stigi á svið, til að standa með þolendum. Í yfirlýsingu þeirra sagði:

„Slaufunarmenning gegn meintum gerendum er ekki til. Ákvörðun þjóðhátíðarnefndar og þögn tónlistarfólks sannar að þràtt fyrir allar byltingarnar sem þolendur og aktívistar hafa staðið fyrir í aldanna rás, að þolendur skipta ykkur engu máli. Að slaufunarmenningin beinist að þolendum. Við skiljum því vel ákvörðun Bleika fílsins að leggja árar í bát þetta árið eftir 10 ár af óeigingjarnri vinnu í erfiðu landslagi. Skilaboðin gætu ekki verið skýrari. Þið tókuð einhliða ákvörðun þegar að þið ákváðuð að það væri mikilvægara að hafa meintan nauðgara beran að ofan uppi á sviði að berja á trommur.

Að lokum viljum við hvetja ykkur sem standið með þolendum að yfirgefa brekkuna þegar hann stígur á svið. Hlutleysi er ekki til. Hlutleysi þýðir afstaða með meintum geranda.“

Twitter-notandinn Auður kveðst hafa verið í brekkunni í gær og taldi ljóst að þriðjungur eða fleiri hafi staðið upp og yfirgefið brekkuna þegar meintur gerandi steig á svið.

Skilaboð úr brekkunni !!!

1/3 ef ekki meira stóð upp og fór þegar meintur gerandi steig á svið.

Þið eruð breytingin 🤍

— Auður (@audurosp90) July 31, 2022

Ljóst er þó að deildar meiningar eru uppi um hver stuðningurinn við heróp Öfga var. Í umræðum á samfélagsmiðlum sem skilaboðum lesenda til ritstjórnar  benda margir á að fjölmargir Þjóðhátíðargestir, sérstaklega börn og eldra fólk, haldi til hvílu upp úr miðnætti og því hafi brotthvarf þeirra ekkert að gera með hinn meinta geranda sem steig á svið.

Ekki liggur því fyrir hversu mikil áhrif hvatning Öfga hafði á fjölda áhorfenda.

Uppfært: Í fyrri útgáfu fréttarinnar var fyrirsögnin „Þriðjungur sagður hafa yfirgefið brekkuna þegar meintur gerandi steig á svið“. Ljóst er þó á viðbrögðum að það er umdeilanlegt og því þótti sanngjarnara að breyta fyrirsögninni.