Óvenjulegur hlutur fangaði athygli vísindamanna nýlega þegar þeir voru að skoða nýjar myndir frá Marsbílnum Perseverance. Ljósmyndir frá Mars eru alla jafna fallegar og heillandi en kannski einnig svolítið leiðinlegar til lengdar því það er svo sem lítið annað en sand og grjót að sjá á þeim.

Vísindamenn kippast því væntanlega við þegar þeir sjá eitthvað annað á þessum myndum, eitthvað sem passar ekki við hina venjulegu sviðsmynd. Það gerðist einmitt í síðustu viku þegar Perseverance sendi meðfylgjandi mynd til jarðar.  Á henni sést undarlegur, krullaður hlutur.

Hann líkist kannski einna helst girni eða bandspotta. Eða er þetta kannski könguló á villigötum? Eða þurrt þang sem sannar í eitt skipti fyrir öll að vatn sé til staðar á Mars?

Nei, ekkert svoleiðis, þótt það hefði nú verið spennandi. Þetta er band úr fallhlífinni sem kom Perseverance heilu og höldnu niður á Mars á síðasta ári að sögn Science Alert.

Líklega hefur bandið fokið fram hjá Perseverance sem náði því þá óvænt á mynd.