Ung kona trúði eiginlega ekki eigin augum þegar hún gekk inn í íbúð sem hún hafði leigt í gegnum Airbnb. Íbúðin var skítug og eiginlega í alla staði óaðlaðandi. Hún hafði því strax samband við leigusalann til að kvarta en ekki leið á löngu þar til hún áttaði sig á vandræðalegum mistökum sínum.

Konan, sem heitir Paige, skýrði sjálf frá þessu í myndbandi á TikTok. Þar segir hún að „algjör ringulreið“ hafi verið í íbúðinni og birtir myndir af skítugum sængurfatnaði, skítugum gólfum, ógeðslegri sturtu og ísskáp.

Að vonum var hún ekki sátt við þetta og hafði samband við leigusalann og sagði honum að hún myndi aldrei geta sofið „þægilega“ í íbúðinni. Síðan sendi hún honum myndir af íbúðinni til að hann gæti sjálfur sé hvernig ástand hennar væri.

Leigusalinn svaraði henni skömmu síðar og brá Paige nokkuð í brún við svar hans. Hún hafði nefnilega farið inn í ranga íbúð!

Hún segist hafa flýtt sér að biðja leigusalann margfaldrar afsökunar og síðan hafi hún fundið réttu íbúðina sem reyndist vera í mun betra standi en hin íbúðin og mun hreinni.

Myndband hennar hefur notið mikilla vinsælda á TikTok og hafa milljónir manna horft á myndbandið.